الواجهة الرئيسية I منتديات خزامى نجد I  إتصل بنا
 
 
دواوين الشعراء
القصيدة
قصيدة لا بغيت اسلى عن العشق للشاعر عثمان العبدالله
 

تابع جديدي سجل زواري إهداء القصيدة رشح قصيدتي فهرس ديواني



انا لا بغيت اسلى عن العشق والهوى = يفزّ الخفوق اليا لقى الريم شرّدي
خلق منهن الرحمن فتنه لمن غوى = إذا سلهمن بالطرف سهمٍ مسدّدي
يطارد وراهن لو على القلب انكوى= وحتى ولو شايب كفيفٍ ومقعدي
وحتى بعد موته وبعثه مع الورى = يبي الحور نفسه دايمٍ في التعدّدي
وانا من عباد الله مخلوق ما ارتوى= ابي جرعةٍ تطفي العطش قبل ما ردي
فلا نيب جايز دام هالحسّ ما طفى= ولو قاله الله في نعيمه لي طردي
عرفت العشق والحب في ماضيٍ مضى= ولكن معاها ابتدا يوم مولدي
شمالية العينين في طرفها الحيا = جنوبية الخدين وردٍ منضّدي
دمشقيّة الاطراف كالماس بالدجى= ونجديّةٍ في ثغرها يسجد الجدي
حجازيّة الأرداف والشعر بالهوى = حريرٍ تناثر فوق صرحٍ ممردي
عراقية الإقدام ، قدّامها انحنى = اراذيل بوشٍ من عميل ومجنّدي
فلسطين ربّتها على الباس والفدا = وحصاد الأعادي من يهودٍ وحقّدي
بنبضاتها دمٍّ نقيٍّ ولا احتوى = عروقٍ دخيله من خشاشٍٍ ووافدي
بها تجتمع كل القبايل بلا عنا = من اولاد يعرب ما عرف بينهم ردي
اذا فوق عرشه خالق الكون استوى= على عرش قلبي استوت في تفردي
كبرنا على حبٍّ جمعنا على النقا= ورسمنا املنا لكن الوقت سرمدي
زرعنا من الأوحلام ما طار كالهبا = وغديت الضحيّه والشماته لحسّدي
تباعد بنا ظرفٍ عن الحب ما درى= وانا احسب حبيبي يوم يوفي بموعدي
احسبه مثل قلبي من البعد انكوى= واثاريه سالي ما درى عن تنكّدي
نستني مع الأيام ملعونة الثوى = ولا فكّرت في امسي ولا اليوم او غدي
سنينٍ العمر ولّت وانا قلبي انشوى = ولا عاد يهنا لي شرابي ومقعدي
انا بعدها طفلٍ حزينٍ ولا قوى = مع الوقت ينساها فلا القلب في يدي
يتيمٍ وتاه بليل في طيفها التوى = ينادي ولكن ممعنه بالتصددي
يبي لو تردّ الصوت او تسمع الندا= ولكن صدى صوته رجع دون تنشدي
مضت مثل حلم لا تحقق ولا اختفى = ينكد عليّ النوم ما اهنا بمرقدي
يقولون سلم الحب كلٍ وما اهتوى= واقول الزمن ساس البلى بالتجددي
يغيّر ضعاف النفس بالجاه والثراء= ومن لازم المبدأ يعيش التنكّدي
فمهما سلت عنّي ولو قلبي اشتكى = يجي يوم تذكرني إذا غاب فرقدي


اول روابط النشر 26/6/2004
http://www.khozamanajd.com/vb/showthread.php?s=&threadid=11805
http://www.ejaa.net/vb/showthread.php?s=&threadid=15042

نشرت بتاريخ 27-10-2005


 


Powered by Dawaween V 1.03
تصميم - برمجة

تصميم : الرّاسم لخدمات التصميم برمجة : أبعاد الإنترنت للتطوير