الواجهة الرئيسية I منتديات خزامى نجد I  إتصل بنا
 
 
دواوين الشعراء
القصيدة
قصيدة درة من صنع ربي للشاعر عثمان العبدالله
 

تابع جديدي سجل زواري إهداء القصيدة رشح قصيدتي فهرس ديواني



التقينا محض صدفة وحسب إنّي صرت زاهد = واثري الكامن غرامه تحت سطحٍ من جليد
درةٍ من صنع ربي من رآها خرّ سـاجد = لو هقيت اني بجنّة قلت حــورية أكيد
ويش ابوصف ويش اخلي كل وصفٍ غير وارد = ما بقى قاموس يكفي يشرح الزين فريد
مهرةٍ من نسل يعرب ساقها للطير طـارد = واثره المطرود منها لـو يهاجر للبعيـد
كنت تايه في الحقيقة عـابرٍ ما كنت رايـد = وعندما شفت البنيّة صوبتني بالوريد
حـاورتني بالعيـون وسددت لي سهم واحد = كان كافي صيد قلبٍ عادته دايم يصيد
قلت مرحا ، واثر دمعة حـايرة والفكر شارد = ربي وش فيها عليّه كيف أبفهم ما تريد
سايرة والدرب مظلم لا شموع ولا مواقـد = كل شيٍّ ضاع منها ما بقى غير النشيد
تشتكي ظلم الأقـارب مالهـا أمٍ ووالــد = وكشفت لي عن خواته كيف بيعن بالزهيد
ذكرتني كيف سبته واختها مليـلة تناشد = داخل المغرب ولكن حاكم الاسبان سيد
وذكرتني بلكنــاري والأثـر لا زال خـالد = بعدها الاسنكندرونه لانقره راحت جحيد
ولتميم بيوم دولة خلف شط العرب واكـد = باقية عبـدان تذكر كل ماضيها المجيد
وين جزرٍ بالخليج كيف سرقت كالقصايد = وين حيفا ووين يافا والقدس تحت الحديد
وابتدت تذكر ليالٍ حمر مع كبر الموايـد = فالحفل كرٌ وفرٌ بين ولـدان وغيـد
التفت ابغى الحبيبة اختفت والجـو بـارد = وين راحت صرت مادري فالزحام اصبح شديد
قمت أدوّر بالحواري والمشافي والمساجد = من سألته قال ما ادري وابتدى شكي يزيد
ولمح رجـالٍ تعدّوا شايلينٍ شخص راقد = في ظلام الليل يمشوا مثل سرّاقٍ بليـد
واصرخ بأعلى جنوني كلكم بالقتـل عامد = ويلكم من رب عالم ماتخافون الوعيد
خذتها للحضن لحظة واستقرت كالشواهد = وسط قلبي قبر تسكن لينما البعث الأكيد
ومات قلبي من نحيبه واندفن معها كشاهد = ثم بعثوا للعدالة يـوم لا مال ووليـد
وابتدى ربي يحاكم كل مجرم لو يعاند = كل شي صار واضح من صفر لأعلى رصيد
وابتدت تشر عليهم كلهم مذهول هاجـد = ويصدر الجبّار حكمه ولجهنم لا محيـد
من تجبّر دون وازع ما يبي هرجٍ لناقد = يحسبن الموت ملكه يأمره مثل العبيد
ومن يفرط في الأمانة او عطاها شخص فاسد = ومن يذل الناس تخضع روسها حتى العويد
ومن شرا بالفلس شيخٍ حلل التحريم قاصد = ومن سرق دم الحيارى وش بقى لك يالحفيد
لو تصدق ، لو تبرع ، لو بنى كل المعابد = كل شي صار واضح لو يرقع ما يفيـد
ومن شرا بالـدين دنيـا دايمٍ للفلس عابد = سخر علومه لخدمة كل شيطان مريد
يالحبيبة لا تخافي لـو زمانك ما يساعـد = دام فيه اللـه أكبـر ينبعث مجدٍ جديـد

اول رابط للقصيدة
اول روابط 24/1/2003
http://www.bin-msaad.com/vb/showthread.php?s=&threadid=8679
http://www.kaznova.com/vb/showthread.php?s=&threadid=51963
25/1/2003
http://www.khozamanajd.com/vb/showthread.php?s=&threadid=3047

نشرت بتاريخ 27-10-2005


 


Powered by Dawaween V 1.03
تصميم - برمجة

تصميم : الرّاسم لخدمات التصميم برمجة : أبعاد الإنترنت للتطوير